Општина Штип продолжи со реализација на програмата за одбележување на денот на градот, патронот на „Свети Никола“. Прво беше оддржана Света архиерејска литургија во соборниот храм „Свети Никола“   по што следеше Литија на релација: Соборен храм Св.Никола до градскиот плоштад каде беше извршено кршење на празничниот колач. Празнична беседа оддржа Митрополитот на Брегалничката епархија г.Иларион а свое обраќање имаше и градоначалникот на Штип, Благој Бочварски:

- Празникот да се слави во кругот на најсаканите и најблиските. Нека кај сите истакне добрина, милост, солидарост и простување, но исто така и практикување на универзалните човекови вредности.Во духот на овој празник да го поттикнуваме најдоброто во нас и кај нашите блиски, независно од нивната етничка, верска, јазична и идеолошка припадност. Богатството на традициите и на различностите ја прави Македонија држава којашто има со што да се гордее во светот. Ќе ги чуваме, негуваме и развиваме тие вредности во насока на создавање држава на еднакви, задоволни и среќни граѓани во Македонија. Само така ќе чекориме кон остварување на заедничките цели за успешна и просперитетна Република Македонија – напомена Бочварски.

Во 11 часот беше отворена и изложба на стари книги што се чуваат во роднокрајно одделение НУ-УБ “Гоце Делчев“ Штип а денешното одбележување завршува со манифестацијата „Младите за Шопов“ во Домот на млади каде се оддржува натпревар во рецитација на стихови на поетот Ацо Шопов.